Aallaqqaasiut

Kisitsisitigut paasissutissani matumani suliffissaaleqisut aamma sulisinnaasut agguaqatigiissillugu qaammammut ineriartornerat nassuiarneqarput. Sapinngisamik FN-ip ataani The International Labour Organisation-imit (ILO) innersuussutit tunngavigalugit suliarineqarput. Erseqqissaatigineqassaarlu Naatsorsueqqissaartarfiup qaammatikkaartumik saqqummiuttagaanit suliffissarsiortutut nalunaarsukkat kisitsisaannit matumani kisitsisit allaanerummata.

 

2016-imi 2017-imilu suliffeqarneq pillugu kisitsisitigut paasissutissani nalunaarsuutinik amigaataasunik naqqiisoqareernerani matumani saqqummersitaq nutarsarneqarpoq.

 

Saqqummersitaq immikkoortunut pingasunut avinneqarpoq, ataatsimut imaluunniit immikkut atuarneqarsinnaasunut. Immikkoortumik siullermi suliffissaaleqineq nassuiarneqarpoq. Immikkoortut aappaanni sulisinnaasut kiisalu immikkoortut pingajuanni kisitsisitigut paasissutissani najoqqutarineqartut naatsorsuinermilu periaatsit nassuiarneqarlutik.

 

Naatsorsueqqissaartarfiup kisitsisaataasiviani bank.stat.gl –imi piffissami 2016-imiit 2021-imut suliffissaaleqisut sulisorineqarsinnaasullu paasissutissaat sukumiinerusut nassaarineqarsinnaapput. Immikkoortumi siullermi tullianilu titartakkat takussutissiallu tamarmik Naatsorsueqqissaartarfiup kisitsisaataasivianit kisitsisit atorlugit sananeqarput. Kisitsisaataasivimmit kisitsisinut najoqqutarineqartunut innersuussinerit titartakkat takussutissiallu ataanni takuneqarsinnaapput.

 

Saqqummersitami matumani iluarsaassinerit allannguutillu

Suliffeqarnermut kisitsisini iluarsaassinerup kingunerisaanik allannguuteqartoqarpoq. Suliffeqarnermut kisitsisitigut paasissutissanut saqqummersitaq www.stat.gl –imi takuuk.

 

Taaguutit nassuiaataat

Suliffeqarneq: Agguaqatigiissillugu qaammammut suliffillit amerlassusaat.

 

Suliffissaaleqineq: Agguaqatigiissillugu qaammammut suliffissaaleqisut amerlassusaat.

 

Suliffissaaleqineq pct.-inngorlugu: Suliffissaaleqineq sulisinnaasut amerlassusaannut tamakkiisumut naleqqiullugu.

 

Sulisinnaasut: Innuttaasut najugaqavissut ukiuni inuussutissarsiorfiusinnaasuni ukiullit.

 

Ukiut inuussutissarsiorfiusinnaasut: 18-init 64-inut (2016-imi), 18-init 65-inut (2017-imiit 2020-mut) aamma 18-init 66-inut (2021-mi).

 

Sulisinnaasunut ilaanngitsut: Innuttaasut najugaqavissut ukiuni inuussutissarsiorfiusinnaasuni ukiullit, suliffilittut imaluunniit suliffissaaleqisutut nalunaarsorsimanngitsut.